Pre-wedding day @MDW

2009年11月6日 (晴)

明天今日就係我地的大日字, 為咗紀念呢日, 所以我地都選擇咗一年前的今天去影結婚相. 當日真係天公做美, 天晴, 間中有雲, 微風

為咗今次的pre-wedding, 事前真係做咗好多野, 例如去染髮, 修甲, 修眉, 買gridle, nubra, 安瓶等等...其實仲有好多準備功夫做得唔好, 不過都唔緊要啦, 最緊要係開心

因為入秋的關係, 而我地最後一個景點係影日落, 所以要3點幾出發, 最靚的日落要有15mins, 所以要好好把握時間, 就係咁, 我地原先個schedule 都要提早, 8點正要去到mdw 到花妝, 所以我5點幾差唔多6點要起身, 之後後final checking 睇下有無野帶漏, 跟住約丙丙一齊去食早餐

原來TST 好多茶餐廳都唔係咁早開, 本來我地打算去味皇, 但未開門, 跟住我地走番轉頭, 好彩我地有足夠的時間, 時過早餐後我地就去mdw 了

我地早咗10mins 到達, 突然發現唔記得問mua 個手提, 如果佢唔記得咗轉時間咁點算, 又或者佢遲到又點算呢 (因為我地見過之前有blogmate 個mua 遲到咗好耐架). 在我地擔心之際, 我地mua -- May 已經到達了

因為我final fitting 時有件衫要再改, 所以我地try 咗先再上妝, 佢話我地都試開衫, 不如一定過換等一件衫 (好多時都係化完妝先換, 所以記得著開胸衫

May 真係好pro, 我唔洗講佢就知我想要d乜, 乜野style 襯我, 我都好放心咁交曬比佢決定. (雖然好多人事前都會想定要set d 乜野頭, 點化法, 但我今次無, 因為我自己覺得一個pro 的mua 其實一睇就要乜野style 襯你, 適合你, 唔洗多說, 由她自由發揮仲會有驚喜)

我化完妝之後就到丙丙啦, 我地大家都唔記得原來佢都有得化妝, 就係咁佢獻出咗佢的第一次了

呢個mua 真係好快手, 大約1半鐘就幫我地set 好比頭同化妝. 下面呢件係我去火車博物館著的. 大家覺得點呢? 佢右邊有個小蝴蝶架, 清清地我好鐘意

我地有帶相機, 但係跟本都無時間影相, 去到火車博物館就即影, 我地多數都係2人相, 好小影單人相, 又抝腰, 又要伸長個頸, 又要個頭唔可以太高, 又唔可以太低, 抝腰又只係條腰, 上半身係要向前, 亞b 真係要求好高, 我地初時都handle 唔到, 咁佢同助手matthew 就做一次比我地睇, 我地睇番d playback, 唔知係咪大家都未溝通過同未ready, 我覺得比之下的景點影得無咁好

我地影影下真係有幼稚園的小朋友去site visit 丫. 好彩d miss 都好識做, 見我地影緊相就叫小朋友唔好走過去, 真係唔該曬, 天真的小朋友見到我仲話我靚女tim

話咁快就去第2個地方, 濕地公園啦, 呢個造型係我3個之中最鐘意的一個, 但係佢地係响個地方影得唔係太多相, 只係响橋同室內.

話說我地响橋到影相時阻住佢地過跟, 佢地一不做, 二不休, 拎起佢地的相機同我影相, 唔知第日有無機會响佢地的facebook 見到我d 相呢. 影完室內我地走咗出去濕地公園外的斜波, 呢到係太好陽光啦, 攪我個流曬汗, 亞B 仲要我又跑又跳, 你都咪話唔辛苦, 因為又要齊喎, 唔係就要再retake

3點幾我地就要起行去第3個景點, 因為日落最靚的時間係得15mins, 所以我地要好好把握. 第一次去白泥, 响呢到影日落真係好靚, 但亞B 話唔係好多時可以影到靚日落, 佢話今日天氣好, 應該無問題. 真係so good 啦

白泥原來係一個泥地來的, 好彩我無因為今次影相而買對白色波鞋, 唔係就total loss 啦. haha.. 每去到一個地方都比人讚靚, 真係好開心呢!!

呢次影相雖然係有d 辛苦, 但係好開心呢~~~

我仲記得亞B 當日同提點我地的說話:-

1. 拗腰丫..唔係老公拗.. 只係腰拗, 上半身唔拗,

2. 頸伸長小小... 宜家over 咗啦.. 頭過番d.. 唔係有頸紋架啦

3. 老公拖住老婆, 唔係老婆拖老公

4. 老公合咗眼啦, 再來過

5. 响左邊.. 跟我做..