點解要秘密結婚呢？

最近無乜時間寫blog, 早前睇咗呢篇文章, 想同大家分享一下:-

係囉，點解要秘密結婚呢？
也許只因為：想不到婚禮怎樣搞。
或者更簡單：諗唔到嗰日着乜嘢衫。
金石良言：「你諗清楚到底係想結婚定想搞婚禮？」依然擲地有聲。
可惜很多人諗完諗罷仍然覺得：一生人只做一次主角（望都望你唔使做第二次啦），當然希望好好睇睇。
但唔怕老實同你講：「大佬」和「主角」真是世界上最「好睇唔好食」的角色，不是人人都具有適合「成為焦點」的體質的，不是人人 handle得到「領銜主演」的壓力的。
身經百戰的超級演員尚且偶有 stage fright（俗稱「發台瘟」），更何況不是常常「萬眾矚目」的正常人家？平日斯文淡定舉重若輕的人，一旦牽涉到自己的人生大 show，也很有可能老鼠拉龜忽然騰雞的。
賓客名單，座位安排，場地佈置不說；背景音樂，儀式細節，餘興節目亦當有朋友與 wedding planners代勞；上個星期話口未完的「當你心愛的人……亂着衫」也可以隻眼開隻眼閉，但起碼，起碼，起碼畀我着件靚婚紗吖！

怎樣為之靚婚紗？

好彩我不是女人，否則一定嫁唔出，且為一個最無聊原因： I've got nothing to wear（ on my own wedding day）！
任你噏，就當講咗一定得先，你希望誰替你做婚紗？
無論哪一位大師設計的哪一款婚紗，我都一定會覺得「不夠靚」。
一見難忘地醜的婚紗倒是見不少，一見難忘地靚的婚紗……回想古今中外各大有錢有面有名譽有地位的名女人，太后皇后公主郡主紅伶紅模富女型女居然想不出誰穿過一件靚到名留青史的 wedding gown。名垂千古的通常只是「誰（幾時）娶了誰」，而不會是「那件婚紗」。
對不起，一條白裙， as一條千古風流人物「同題作文」的題目，能有幾「前所未見」？
真絲雪紡喱士刺繡釘珠，直身魚尾圓球巨傘，長中短公主袖無袖……如果你是服裝界的專業人士請替我數下去，我知一定還有一大堆「微調」的，但掃興地一句到尾；還不是一條白裙！而且還是要投射出「莊嚴，純潔而浪漫的白裙」，基本上已是個冇乜發揮餘地的梗局，所以無論那件名師設計到底是真絲雪紡喱士刺繡釘珠（下刪 300字），對我作為觀眾來說，都是差不多的，多幾粒珠多幾層紗那些刺繡是密是疏有沒有移了位置……大概只有新娘自己留意到。（將心比心，我也有 50套 tuxedos，但我預咗除咗我自己之外冇人留意到每套有何分別，萬一結得成婚要揀一套着，亦相當棘手）。所以在這批「擸」吓眼冇乜分別的白裙中，實在很難選中一條輕易艷壓群芳、一見非穿不可的 dream dress……終於，因為嫌啲婚紗悶，而嫁唔出，或者，嫁得出，但冇婚紗着，乜嘢大 show都唔搞。
（好了，現在你知道我為甚麼時不時不肯出席些甚麼甚麼頒獎禮了，你以為我怕冇獎攞，我其實只驚冇嘢着。）

好在有拉斯維加斯

讀過一篇醫學文章，據調查顯示突然之間心血來潮話戒煙就戒煙的成功率，比攞定良辰吉日「今年 12月 31號晚 11點 59分 59秒我吸埋最後一飛就決定搣甩佢」的那些人，成功率高 6倍。結婚大概也靠類似的「一嘢」衝動才最易成事吧，汪明荃和楊千嬅都說「話嚟就嚟，衫都冇準備」反而「撮」一聲變成了 X太才回港，如果像我這種麻煩人堅持「好好睇睇」才 mi mi mo mo揀得衫嚟洩咗道氣都攤凍晒了，不如又遲啲先了，灶罅就是這樣被攝的。所以美國，尤其 Las Vegas真好，容許閃電結婚的男女清楚知道該劈落哪支避雷針，打鐵趁熱。令乾柴和烈火瞬間叮起成炊的米飯。

8點後的中環

星期日的中環最多是甚麼，你一定知道。
一至五晚上的中環最多是甚麼，你又知不知道呢？
不知道就試試平日 7點後去畢打街的 LV門口，雪廠街的 Prada門口，和皇后像廣場的 Chanel門口看看吧。
一定有人在影婚紗相！一隊沙龍團的陣容通常是這樣的：攝影師乙名，打燈搬器材的助手乙名， set晒頭戴晒花身穿出租婚紗或晚裝的新娘（兼化妝師）乙名，全身踢死兔但走景時兼替新娘拎化妝箱的新郎乙個。
本來令人羨慕祝福的事，不知何故總令我覺得騎呢搞笑，大概是因為那些滿頭大汗的新郎哥仍努力搵位煲煙和那些遊走於不同景點間猶如小販走鬼的新娘子，情急時一手抽起紗裙內的呼拉圈，露出一對幾乎見底褲的腳和腳上那對「唓，都影唔到 o架啦」所以隱藏在婚紗底的 Nike吧！
巨型幻燈片我可以接受，假扮羅浮宮的園林實景我也頂得順，就算山長水遠深入不毛搵個薰衣草田或風車或燈塔我都仲可以理解，但為甚麼呢？為甚麼是 LV和 Prada和 Chanel門口？ Marc Jacobs會替你證婚嗎，還是你以為 Miuccia Prada和 Karl Lagerfeld會保佑你們百年好合年生貴子呢？你又有冇見過法國人着晒婚紗拖「行」馬去 Hermé s門口影結婚相先？

最後問題

再問一次，如果你有權揀世上任何一個時裝設計師替你做婚紗，你會揀邊個？
這時，你會羨慕鬼妹仔朋友 A，有件家族世代相傳的百年婚紗，意義大於一切，唔使煩。你會羨慕朋友 B早年貪平上網 bid定了 Viktor& Rolf X H&M那件千零蚊貨仔的大師真迹，從此坐喺度等嫁唔使四圍撲。
你會羨慕荷蘭儲妃 Princess Mabel Van Oranje-Nassau在唔使揀冇得揀的情況下徵用本國唯一時裝國寶 Viktor& Rolf設計的婚紗。
你會羨慕朱薰小姐都 Mercibeaucoup的此心不二，將來出嫁可以叠埋心水等宇津木替她設計婚炒，或，至少找到了款式的路向搵件有 Mercibeaucoup風味的白裙……
如果你沒有上述的人咁好彩，而你又不甘於「唔會好靚又唔會好唔靚」的婚紗悶局，我建議你把心一橫揀件包保大家冇諗過的白色東西， hm……例如換了是我，我寧願搵番 Hussein Chalayan出嚟整件太空穿梭機型的婚紗畀我，或照米妮老鼠的身形款式整件毛毛人形的白色版……婚禮與婚紗，有時不一定關於靚的，而是關於難忘的。

本周真心

點解要秘密結婚呢？嗰班藝人。
點解唔得呢？
我覺得一名表演者把歌唱好把戲演好把司儀做好已經值得尊敬與收 cheque，因為他們已經完成兼做好份內事了，他們的感情生活，到底是結了婚離了婚同了居還是已經生埋一竇仔女，那是他們自己的私人秘密，歌酬片酬無包的，他們當你朋友的話，咪講你聽囉，不講的話，佢其實冇欠你 o架。
就算你冇做過藝人唔明白，我不如舉個你能設身處地的例吧。
你做廚師就煮飯做司機就揸車，老闆問你有冇拍拖，你答是人情不答是道理，就是這樣簡單。
Text by黃偉文

Source: http://hk.apple.nextmedia.com/template/apple/art_main.php?iss_id=20090906&sec_id=462&subsec_id=466&art_id=13178231&cat_id=7351304&coln_id=6804020

我覺得佢寫8點後的中環寫得好好丫. 雖說如果唔係影婚紗相, 跟本唔會响個d 地方影相, 但係大家有無相過好多人會睇住你地影相而指指點點呢? 所以我同丙丙都無考慮响中環影相